我直接答您地，我個人真係好固執好硬頸，因為我對每一段感情都好認真，絕對唔係玩弄感情，所以而家先困住左自己，非常困惑，對三個人都係折磨係痛苦，對唔住，要您地浪費左寶貴既青春係我呢個衰人身上無論您地最終認為值得與否。
可能外人會覺得我好貪心，又想要穩定又想要浪漫，又驚失去左既永遠都失去，仍然纏繞在得失問題上。8年同幾個月當然談唔上，因為硬要去用呢個時間去對比，根本比唔上，唔明您地點解要執著係呢個時間軸上？對我黎講，這些過去既時間係發展同了解既進程之一，並唔存在相處得耐就代表一定冇問題，甚至相處十年二十年就一定要結婚，這種想法會否太荒謬？係我太唔現實嗎？原因係我唔想咁早用婚姻綁住自己既二人生活，明白到兩人相愛既時間實在太短太寶貴，對我黎講，唔想經歷離婚先發覺唔適合大家，所以我寧願拍耐d都唔結住，除非您地都介意年齡既問題，又或者諗深一層，我真係想得太遠，諗得太多。
而得失問題，講就易做就難。
您地雙方根本好多野都好唔同，唔好再作無謂既對比，有冇諗過俾你模仿到對方既野又點，我就會去愛上？太膚淺了吧！
我亦唔似您地都有戀愛經驗，明白到唔想再重蹈覆轍，咁所以呢？我就要跟住您地所謂啱既模式去走？一個女人曾經咁樣傷害過您地所以就唔容許我將呢種錯誤再次出現係你地身上？我無法理解到您地咁樣做或者咁既模式係咪真係啱，這就是我固執對吧。
呢一個星期，我話要同您地斷絕來往，唔傾唔見唔理您地，知道存在唔公平既現象，呢個方法或者真係唔可行，不過我豬一樣既頭腦真係唔知仲有咩方法。但無論您地再換狀態換頭像po咩我都話唔會理，最終呢？我做唔到，仍然好關心您地，我又再一次打破左自己既承諾，我真係好唔開心好抑鬱好焦慮。
一個人做唔到佢所訂下來的承諾，就談唔上去應承任何人任何事，叫我邊有自信去再承諾您地，您地都好好，錯既係愛上一個容易被人煽動，又成日顧慮太多，唔知自己想點，又多多藉口多解釋既人，我並唔係您地想像中咁好咁樂觀咁堅強，我非常悲觀，固執好勝，常認為我真心對一個人好係我應有既責任，認為做人唔可以埋沒自己本性同良心，最終呢個三角戀令我明白到講咩良心？！最冇良心既我去同人講良心！可恥！我唯一能夠確定到既係我對您地都存在真心有動過情，都唔想失去咁好既知心，更由頭講到尾係唔想傷害您地但我竟然太愚蠢傷得您地仲深，對唔住，我真係唔係故意，好心做壞事對吧。
我知您地都有不斷質疑，講大家或想大家既不是，大家都話想拉返我上黎，可惜您地方向不同，反而令我認為自己真係好衰，變心、說謊、隱瞞、親手打破信任、又非常善忘都係我唔啱，一腳踏兩船係最唔啱，但我從來冇諗過水泡後備呢樣野。我好想去保護您地又唔啱。個個都認為一定有樣野控制住我先令我兩邊都放唔到手，決擇唔到，我都好想知呢樣野究竟係咩黎？
甚至我個個朋友都話，其實呢種情況好普遍好簡單，點解會搞到咁複雜？想要邊種生活既咪要邊邊囉。問題在於，我同另一邊未正式展開過交往生活，叫我點知邊種生活先適合，我又唔可以咁做，因為又會對唔住另一方，呢個亦係我困擾既道德問題之一。
我確實有選擇困難症，自己去買野面對二選一都可以諗半個鐘咁離譜，更何況呢次選擇係返唔到轉頭，係我廿幾年黎最難既決擇，我真係好驚，唔知點面對，真係好對唔住您地我不斷拖，呢個係我最嚴重既問題。
曾經您有問過點解冇證據證明下，單憑一個人口中所述，就會去信？而家我可以答您，因為我相信佢愛我冇必要呃我，唔係所有野都一定要有證據先去信，而家我證明到佢冇呃我啦，咁又點？證明左之後對您黎講，有d咩咁重要？
仲有您地都怕我面對雙方時會有不同既一面，反省返原來我真係有，太可怕，點解會出現左咁樣既自己，自己都接受唔到，又再次證實我只係一個唔懂愛情既衰女人，點解要同時愛上兩個好男人，仲要令您地痛苦咁等落去，所以我暫時無法面對自己面對您地，或者要失去左先識得後悔，先知道最終想同邊個一齊，我知道甚至可能導致兩邊都真正失去了，真係又蠢又傻。
您地不斷做令我開心既事，而我就不斷令您地傷心，您地甚至異口同聲同我講，只要您開心我就開心，咁我又做左d咩令您地開心過，真係好內疚。
我係呢段感情中係最大既失敗者，我知道我既存在令您地無法開心，所以您地永遠痛恨我、離棄我、拋開所有一切與我有關既人或事都好，只要您地開心就足夠。
到呢個地埗，發生左咁多事，時間同等候，花係我呢個咁既人身上，您係咪仲認為值得？
